من حياة محطمه إلى…………… سعودي

السلام عليكم ورحمة الله وبركاته

حبيت احكي لكم قصتـــي لاخذ العبره منها واتمنى انكم تعيشون السعاده الزوجيه وتدعون لي بالتوفيق والمحبه والموده بيني وبين زوجي

قصتي هذي انا انسخها لكم من مــذكرتي كاتبته من فتره وجاء اليوم الي المفروض الكل يستفـــيد من خبرتي البسيطه بالحياه والي كان من ابرز نجاحاتي …

*

بسم الله الرحمن الرحيم .

اتـذكر نفسي قبل كم ســنه كنت ابكي بحرقه واتسأل ليش زوجي مايحبني مثل ماأحبه مع انه مش مقصر مع بشئ معقوله هو يؤدي واجبه اتجاهي كــزوج بس ؟!

وليش تغيــر وماصار يهتم لمشاعري ؟

معقوله أهــوه بحياته وحــده غيري يحبها ويدلالاها وانا لا

جلسـت ادور حـل لمشكلتي اربــع سنين وبكل يوم تتأزم حدة المشاكل بيننا وكل يوم يكبر الشرخ بجدار حياتنا الزوجــيه الين صرنا انا وهو مجـــرد اثنين يؤدون ماعليهم من واجبات وعلى مضض محد فينا يبي للثاني الخير الكره صار متبادل بيننا والنوايا الشينه من ناحيتي له كثــرة كان كل همــي احطمه مثل ماحطمني وبس ولا يهمني شئ ثاني …

تحطيم زوجي ماكان اني لو تعدلت لــه او تزينت طنشني لا هــذا اعتبره شئ تافه لاني انجرحت منه في بداية زواجي كثير لكن تحطيمه كان اكبـــر بكثيــر

كان لو يدري عن اي شئ يسعدني يوقفه

دراسيتي واعترض عليها الين وقفتها

المنحه الدراسيه ورفضها

حتى لما وصلت بطائق مكافئه لي ماصرفها الين انسحب المبلــغ

المهم شئ يسعد قلبي يعترض طريقه المهم مااكون فرحان "وانا اعذره "تدرون ليش ؟

لاني معيشته نفس الجـــو اي شئ فيه راحته اخربها عليه

بيجلس على التلفزيون اعصب انت تشوف الحريم شوفني انا لو تحس نفسك رجال "اهانه له بدون مااحس"

بيجلس على الكمبيوتر وبيشوف لقطات اطب عليه ايـــــــــــــه انت تدور وتفرفر بهاللقطات وانا مطنشني

بنروح السوق ماتقدر عينه تفر يمين ولا يسار صايره له عسكري مرور "ممنوع الالتفات " ادري بك تبي تشوف البنات وانا ولا كـاني موجوده .

يجي يأكل وهو تعبان ومب قادر يأكل تحلل الا خت شفاه الحاله "لو كنت ادري انك بترجع شبعان ماكنت تعبت روحي وطبخت لك .والمسكين هو من التعب مب قادر يتنفس

نجي للنوم وماادركم مالنوم

ياسلام بتنام وانا من بيجلس معي>>> طول النهار نايمه وطول العصريه متمدده عند التلفزيون والمغربيه عند صديقاتها ومن العشاء الين هو يوصل على الكمبيوتر "وبعد محد جالس معاها.

وهو يحليله من دوامه لتخليص امور شغله غير اعماله الخاصه

وتصير احلى معركه بيننا

وشو كانت النتيجه

*كرهه متبادل وضغينه
*تحطيم المعنويات المتبادل
*التلفظ بالالفاظ مااعرفها بس المهم تضايقه ."هو مايسب ياحليله بس يطنش وانا اززيد">>>

المهم انه حياتي صارت اشبه بالسلطه كل شئ فيها ممزوج مافيه حاله استقرار

فجأه قال لي القرار الحاسم انه يبي يتزوج "من حقه "يبي يرتاح من هالنكد وانا انقهرت قهر ياسلام تتزوج وانا مقهوره منك وانا مو محصله حقوقي باكملها منك قال ماقصرت معاك بشئ شوفي كيف عايشه وغيرك كيف عايش واحمدي ربك

سكتت جلست ثلاث ساعات بصمت كنت اتمنى فيها دمعه تنزل وارتاح او اي شئ يكسر هالصمت مادري الدنيا هذيك الساعه وين اختفت والعالم راحوا وجلست بهــــــــــــــــــــــــــــ ـدوء ولاول مره من بعد زواجـي الي صار له خمس سنين

طالعت ببيتي قصــر

غرفتــي غرفة ملكه

اغراضي من الغالي لبس ماكياج عطور شنط كل شئ ماركه وكل ماركات الدنيا عندي

كل شئ عندي كل شئ متوفر كل شئ املكـــه الا "امــير القصـــر " وينه فيه؟؟؟

انا مضيعته من ايديني بسبب نظرتي السوداء له …عيشته بظــلام دامس من المشاكل فقرر انه يعيش حياته بعيد عن الدمار النفسي وقرر الزواج

قرر يتركني وانا احبه واموت فيه "وتسالت كيف احبه وانا معيشته بالم؟! كانت الاجابه حبي له كان حب تملك مثل مااتمتلكت كل شئ وخليته لي قلت بسويه نفس الشئ حاله حال اغراضي وللاسف لانه انسان رفض هالشئ وكانت المشاكل بيننا بتلك الوتيره .هم نكد غم بس

بعــــد فتره طويله من البحث عن الحلول المتواصله لقيت ضالتــــي لقيت الحل

وهو اني اشغل نفسي بشئ غير زوجي وهالشئ لازم واكيد ولا بد اقتنع فيه
واني اتركــــه حر وهو بالفعل حـــر ياكل كيف مايبي وينام متى مايبي ويشوف الي يشوفـــه المهم اخليه حــــر ولحاله ومتى مايبغاني يناديني وبجيـــــه
واني اعيش نفسي سنها اطلع وادخل واخرج وافرح وارقص واتكلم ولا انســـى ذكر الله

المهم بعد ماقرر يتـــزوج ويترك قصري الوردي الون الاســود بكل انواع معاني النكد والبؤوس قررت انا ارجـــع لنفسي واشــوف الخلل الي صاير والي كنت حاســه به بس غبائي وعزة النفس الي فيني والنيـــه الي كنت ناويتها كانت مانعتني احل او اربط في مشاكلي والمشكله كنت كل يوم ازيـــد بالعناد

كنت مفكره سالفة زواجــه مجرد تهديد لــي الين جاتني اخته وقالت لي "شفاه اخــوي قال لي اخطب له وكلم امــي وامي قالت مابي زوجتك تدعي علي بسببك شوف غيري وكلمني اليوم اشوف اخت زوجي "

اخت زوجها عمرها هــذيك الايام 32 سنه ومش متزوجـــه الفرق بيني وبينها سبع سنين طبيعا انا الاصغر لكن هو كان يبي وحده عاقل وتقدر الزوج وسالفة انه يتزوج صغيره مايبي يعيد نفس مشكلته معي

قالت لي انا ماحبيت امشي بكلامه وحبيت اخبرك قبل لاتقولين سوت شئ وخربت بيتي ابتسمت لها وقلت هو خربان من قبل يابنت الاجواد اخطبي لاخــوك والي الله يريده بيصير

جلست يومي مثل الي خلاص تدور اي خيط وتبي تمسك به طالعت مره ثانيه بيتي ولاول مره اكتشف انه بيتي لون وردي وبيتي من احلى البيوت وشفت ركن كنت اموت فيه كان فيه عصورين زوجي يحبهم ويحب الصبح يفطر في هذاك الركن الي صار ركن ميت بكيت بحرقه على الي مضى وعلى الي راح يجي لهذا البيت بعد زواجــــه ولاول مره اصرخ بيتي وزوجي والله احبكم وماراح اسمح لاحد ياخذكم مني

المهم على العشاء رجع للبيت لقا العشاء جاهز وكنت حزينه وساكته وهو كان بعد حزين وساكت تدرون ليش ؟؟

لانه اخته قالت له شفاه وافقت و قالت كل الي الله يريده بيصير اخطبي لاخوك

سالني اختي زارتك اليوم قالت ايوه هو تعشى اما انا شربت عصير ورحت انام قبلـــه دخل الغرفه قرب مني قال نمتي مارديت طفى النور ونام مفكرني نايمه مايدري قلبي بيحترق جلست ساعة صمت بعد ساعه قلت ليش مااقوم اصلي قيام الليل من زمــــــــــــان ماصليتها مضيعه حياتي بلهو ومشاكل ورحت اصلي ماحسيت الا اذان الفجر ياذن كم صليت ماادري لكن كنت مشتاقه لربي مشتاقه اشكي له وابكي له واحكي له قلت يارب لو بزواجه خيــر له ولي وفقه ولو في زواجــه هم ونكد وزيادة الم ابعده عنه انت اعلم مابي واعلم بحالتي يارب .

قام هو وراح للمسجد ولما رجع لقاني رجعت انام .جلس هو كعادته يقراء القران ولبس وراح لدوامه الساعه تسع صحيت اتصلت فيه ولاول مره من بعد مروراربع سنين على زواجي اتصل فيه الصبح

قال :خير شئ صاير بالبيت.
قلت: لا
قال: تبين شئ قلت بطلع للسوق
قال: ليش
قلت :ابي شئ
قال: اوكيه روحي

رحت للسوق اشتريت عصفورين مريت محل الورد اخذت ورود اشكال والوان ومريت للاسماك واخذت اسماك لحوضنا الميت باهمالي وحطيت العصفورين بنفس المكان الي هو يحب يفطر فيه .
وبالعصفورين دبت الحياه ببيتنا .ووزعت الورد ببيتي ورشيت بخاخ برائحة الطبيعه وحطيت الاسماك بالحوض وشغلت الحوض وصار بيتي حديقه مثل ماكنت وكان يحب هو يحب العصافير ويموت فيهم وانا احب الورود والاسماك .

كنت ادور على اي شئ يغير ببيتي ويدخل الفرحه بقلبي اولا ثم قلبه وقبل قبله كنت ابي اي شئ يطلعني من جو الحزن الي انا فيــــه لاني حسيت اني مهما سويت وحاولت اوقف هالزواج ماراح اقدر لانه عزم على الزواج