المقادير :
4 صدور دجاج مخلية + ورك مخلى (يعطى طراوة جميلة للصدور)
بصل مبشور ناعم
2 معلقة كبيرة بقدونس
3 ملعقة كبيرة بقسماط مطحون
2 بيضة
1 حبة فلفل اخضر مقطع صغير جدااا
2 فص ثوم مفروم ناعم جدا
ملح + فلفل اسود + بابريكا + بصل بودر
الطريقة :
**نفرم كل المكونات فى الكبة حتى تمتزج ببعضها جيدا وتصبح ناعمة جدا
اذا حسيتى ان العجينة لينة زيادة عن اللزوم ممكن تزودى بقسماط مطحون بس مش كتير لان البقسماط هيخليه ينشف ويبقى طعمه مش لطيف
هى كده كده العجينة بعد الفرم بتبقى لينة ومع الخطوات ان شاء الله هاقولك تتعاملى معاها ازاى
**لتصبح مدخنة ….افضل طريقة اكتشفتها تدخين العجين قبل التشكيل ….وهذا ايضا للكفتة والمشاوى …فيظل الطعم موجود بقوة
اضع وسط العجين قطعة فويل بداخلها شريحة بصل داخلها قليل من الزيت واضع فيه الفحمة المشتعلة واغطيها فورا جيدا واتركها ساعة ثم اتخلص من قطعة الفويل بما داخلها
**نضعها على بلاستيك فيلم ونقفلها جيدا وتدخل التلاجة ترتاح حوالى ساعة وممكن لتانى يوم …لان حاليا هيبقى صعب التعامل معاها …هتبقى عجينة رخوة جدا صعبة التشكيل
**نضع العجين بين طبقتين بلاستيك ونفرد بالنشابة بخفة جدا ونكون حذرين بسمك متوسط لا تكون رفيعة جدا حتى لا تجف عند الشى ولا سميكة فيكون قلبها نى لعدم وصول الحرارة
**تدخل الفريزر حتى تتجمد تماما
**بعد خروجها من الفريزر نتركها حوالى 3 دقايق تفك بسيط بس مش تفك خالص عشان نعرف نشكلها …لانها لو فكت خالص هترجع عجينه لينه جدااا ومش هتعرفى تتحكمى فيها ونقطعها بالقطاعه المستديرة
اوعى تسيبى البرجر يفك التلج منه خالص ….شايفين لما قطعته لسه متجمد زى ماهو عشان اعرف اتعامل معاه
**بعد ما نشكل البرجر ندخله الفريزر تانى يرتاح قليلا او ممكن تشويه علطول مفيش مشكلة …بس الافضل يرتاح ربع ساعة كمان عشان تضمنى ان شاء الله انه يفضل محتفظ بشكله وحجمه اثناء الشوى
**بعد ماخلصنا البرجر نضع بين كل وحدتين ورق زبدة او بلاستيك فيلم وده الافضل عشان مش تلزق ولما تطلعيها تطلع بمنتهى السهولة ….على عكس ورق الزبدة لما تدخليه الفريزر وتيجى تشيليه من على البرجر هيغلبك شوية
**نمسح الشواية ببصل (افضل شيئ لعدم الالتصاق البصل) ونتركها تسخن جيدا
يعنى لما نيجى نحط البرجر يعمل تششششش عشان ياخد صدمة ويقفل المسام وما يخرجش العصارة بتاعته وتبقى بتاكلى عجينة برجرحزينة جافة
وبعد ما ياخد الصدمة تخلى النار تبقى متوسطة وما تقليبهوش غير لما الوجه الاول يكون استوى عشان لو قلبتيه وهو لسه ما استواش من الوجه الاول هتضيعى ملامح البرجر خالص والعجينة تشكيلها هيضيع لا قدر الله
**يزين ويقدم
احنا بنحبه سندوتشات فى الكيزر او الفينو وعشان الدايت فكرت وقطعت الخبز البلدى على حجم البرجر وطبعا لم استخدم كاتشاب او اى شيئ …فقط خس وجنبه طماطم شيرى وواحدتين بطاطس محمرة
وبالهنا
